«Жаңа адамдар» БҰҰ форумында Каспийді сақтауға шақырды
Белсенділер Бангкокте өткен БҰҰ форумында Қазақстанның атынан қатысып, халықаралық қауымдастықты Каспий теңізін сақтауға күш біріктіруге шақырды.
30 қазанда «Жаңа адамдар» Бангкок қаласында өткен SEA of Solutions 2026 халықаралық форумында Қазақстанның атынан қатысты. Форум БҰҰ-ның Қоршаған орта жөніндегі бағдарламасының (UNEP) және Шығыс Азия теңіздері жөніндегі үйлестіру органының (COBSEA) қатысуымен ұйымдастырылды. Жиынға мемлекеттік органдардың, ғылыми қауымдастықтың, халықаралық ұйымдар мен азаматтық қоғам өкілдері жиналып, теңіз экожүйесін қорғау мәселелерін, соның ішінде Каспий теңізінің экологиялық жағдайын талқылады.
Форум аясында «Жаңа адамдар» Каспийді сақтау мәселесін көтерді. AntiTrash азаматтық науқанының белсенділері бұл тақырыпты бұған дейін де бірнеше рет қозғап, экологиялық акциялар өткізіп, жағалаудағы мемлекеттерге үндеу жасаған және теңізді қорғауға бағытталған бастамаларға қатысқан. Қазақстан Президенті Қасым-Жомарт Тоқаев та бұл мәселені халықаралық деңгейде көтеріп, Каспийді сақтау үшін бірлескен күш-жігер қажет екенін атап өткен.
«Каспий теңізі өңіріміздің ғана емес, бүкіл әлемнің энергетикалық қауіпсіздігін қамтамасыз етуде маңызды рөл атқарады. Қазақстан Каспий барлық өңір мемлекеттері мен өзге де елдердің игілігі үшін бейбітшілік пен ынтымақтастық кеңістігі болып қалуы тиіс деп нық сенеді. Сонымен қатар су ресурстары мен экология саласында бірлескен күш-жігер арқылы оны сақтау да аса маңызды».
Бұл үндеу Каспий теңізін сақтауға назар аударту мақсатында жасалған екі дәстүрлі қазақ бейнесі арқылы толықтырылды. Оларды таныстырған белсенділер теңіздің тағдыры тек жағалаудағы бес мемлекеттің ғана емес, сонымен қатар жаһандық деңгейде қолдауды қажет ететін ортақ мәселе екенін атап өтті.
Белсенділер ұлттық киімдегі образдарымен домбыра мен қобызда қазақтың әйгілі «Көңіл толқыны» және «Ерке сылқым» күйлерін орындап, музыканың тілімен басты үндеуді жеткізді: Save the Caspian Sea.
«Күй арқылы біз халықаралық қауымдастықты Каспий теңізін сақтау жолында күш біріктіруге шақырамыз. Бүгінде Қазақстан Каспийдің тартылуы мәселесін ең жоғары деңгейде көтеріп, нақты шараларды ұсынып отыр. Олардың қатарында су ресурстарын сақтау жөніндегі мемлекетаралық бағдарлама, бірлескен ғылыми жобалар және елдер арасындағы үйлестіруді күшейту бар. Экологиялық шешімдердің салдары бір елдің шекарасымен шектелмейді. Сондықтан бұл мәселенің шешімін де бірлесіп іздеу маңызды».
